Club Poetico

'E ffacce d' 'e ffigliole ô mese 'e Maggio,
se pigliano 'o culore d' 'e ccerase.
Tignute 'e russo vucchelle bbelle e ttonne,
so ppronte p'essere culmate 'e vase.

Ddoje cerase ncopp'ê rrecchie d' 'e nnennelle,
quacche rubbino dint'a 'e jonne trezzelle.
Tant'acqua cade lesta 'into a 'e spaselle:
meliune 'e gocce tuculeano 'e cceraselle.

Nu fuje fuje generale: allucca 'o temporale!
Na cuppietta s'apparta 'into a nu casulare.
'E verde smeraldo ll'arbere se so' vvestute,
nu passero fa 'o nivo: ll'ha quase fernuto.

'Int'a na chiesiella na vecchia campana,
vucata d' 'o viento sona chianu chiano.
File d'evera mme ciuculéano 'e mmane,
'e tanta frutta fresca se regneno 'e rame.

Na figliola s'appoja ddoje ruselle nsino,
'O contadino venne cerase ncopp'ô carrettino.
A ll'intrasatto allucca forte nu tuono;
scenne nterra nu viulento acquazzone.

Ll'aria fresca frizzantea pe ddint'ê nase:
se ncupisce 'o cielo, tremmano 'e ccerase.

Aucelluzzo ca 'e juorno cinguiette,
arreto a 'e sbarre 'e chesta caiulella.
Nun può gghjì pe ll'aria a vvulà,
p'egoismo t'hanno muzzato 'e sscelle.

'A quanno te si' affacciato â vita,
'int'a 'stu carcere t'hanno nzerrato.
No, tu nun hê fatto niente 'e male,
nun saje pecché staje mprigiunato.

Nun te può cercà na cumpagnella,
nun può ffa' nzieme a essa 'o nivo.
Cu tte 'a sciorta è stata poc'accorta:
haje 'a sta' ngalera nfin'a cche si' vvivo.

Nun saje comm'è ffatto 'o munno:
'int'a 'sti ggrate nun può avé nisciuna scola.
Nun te può ffa' nu giro pe ll'aria fresca,
nun può sapé chello ca vulanno se prova.

Nun 'o ssaje...comme 'o ppuò sapé,
nfin'a ddó vulanno avisse pututo arrivà.
Zumpiette sulo, cchiù 'e chesto nun può ffa',
nun cunosce 'o sapore doce d' 'a libertà.

Int'a cajola nchiuso d' 'a matina â sera,
nun saje quann'è vvierno e pprimmavera.
Passeno ll'ore, 'e juorne, 'e ssemmane,
ma tu nun 'o ssaje si è ogge o dimane.

Nu bbellu juorno 'o bbecco tujo nvecchiato
ntona na canzona triste e appassiunata.
Muove na scella ca 'int'a cajola se ncricca...
po' smierze 'a capa, guarde ncielo e ffaje: "cip."
"

'Int' 'stu vico friddo, ggelato e nniro,
c' 'a vvierno pare ancora cchiù scuro,
chino 'e case muzzecate d' 'o ggelo,
cu 'e mmacchie nere nfacci' 'a 'e mure;

nce stanno case ricche e ppuverelle,
se raccontano fatte brutte e storie bbelle.
Ntanto ca na luna a fforma 'e connola
tutt'e ninne, 'e ttutt' 'e nnenne cunnulea,

ogn'ombra corre matina, sera e nnotte:
a ncurnicià tutto chello ca trova se sfezzea.
'Int'a na casa fredda e agghiacciata
'a sciammetella 'e na cannela tremma:

allumma lenta lenta na nenia triste...
ca 'int'ô silenzio na voce ntona lemme.
Na femmena se guarda na cammisa:
è sporca ma nun so' mmacchie 'e sudore.

Nun è strupicciata pe 'a troppa fatica,
nun è nu panno mprufummato 'e lavoro.
'Int'a cchisti vicarielle grigie e scure,
addó 'o sole nun guarda maje abbascio,

sott'a 'sti palazze addó nce sta tanta ggente:
case ricche ncoppa e miseria 'int'ê vasce.
È na nuttata scura, 'a strata s'è addurmuta:
'e suonne hanno accujetate tutte 'e penziere.

'Int'a na casa, nu campaniello romp''o silenzio:
n'ommo cu 'a divisa scassa ll'atmosfera.
Na povera femmena subbeto capisce;
ave appena appena nu mancamento.

Ll'uocchie lle se fanno lucide lucide,
nun chiagneno...pecché nun è 'o mumento.
Quanto dulore po' ddà 'a miseria
pe cchi vede 'a ricchezza attuorno a se.

Soffre, sperisce: 'a vulesse pur'isso,
ma nun tutto chello ca se vede se po' avé.
Accussì è assaje semplice a sbaglià;
nun se po' ssempe e ogni ccosa desiderà.

Allora te cunvince ca è ffacile a ffa' 'e sorde
e ccu quacche delinquente faje accorde.
Nfine, ê vvote succede ca 'int'a 'sta jacuvella,
dalle ogge, dalle dimane, ce rimiette 'a pelle.

Affianco ô lietto, ll'uocchie russe 'e chianto
Se guarda 'o figlio e pparla cu 'e sante.
Po' comme si sagliesse 'a n'abisso
se fa curaggio e se mette a pparlà cu isso:

"Gesù statte attiento a 'stu guaglione:
è nsisto, però tene 'o core bbuono.
Nun 'o ddà a vvedé, ma tene paura:
falle luce, nun 'o fa' nciampechià 'int'ô scuro.

Cummuoglialo e qquann'è vvierno,
quanno 'o ggelo fa scennere 'a neve
quanno 'o friddo lle trase dint' 'o cuorpo,
tu cuntrolla si ll'è sagliuta 'a freve.

Quanno vene lloco, abbraccialo,
accuoglielo meglio ca può 'stu figlio mio.
Si vide ca soffre pe ll'accuietà
accucciulealo accanto a Mmaria.

Aiutalo comme può 'stu core affranto,
armeno llà ncoppa, falle addeventà santo."
Ntanto 'a luna ca tutto vede e ssurveglia,
pur'essa d' 'o cielo se mette a ffa' 'a veglia.

È na vita ca addimanno,
ma nun trovo risposta...
però continuo âddimannà...
pecché tenco 'a capa tosta.
Pecché 'o pataterno
crianno 'a razza umana
ha miso vrancate 'e fetiente
mmiez'a 'e cristiane?
Forse mentre mpastava,
fra tanta confusione:
quacche piezzo fraceto,
s'è nfezzato miezz'ô bbuono.
Nun te voglio criticà...ma...
ddoje ddumande t' 'e ffaccio:
pe ttramento ca te parlo,
te voglio guardà nfaccia.
Si overo ce vuò bbene
...e nun ce vuò male...
me saje dicere pecché...
nun simmo tutte eguale?
Quanno hê criato 'o mare,
truvannete a nciarmà,
na nave ggià llà pronta
t' 'a putive pure mmentà.
Accussì chi passava 'a llà
teneva ggià pronto nu riparo
e cchi 'o ssape quanta ggente
se poteva salvà a mmare!
Pecché c'hanna sta 'e povere:
accussì ha deciso 'a casta?
Ma quanta vocche teneno,
nun diceno maje basta!
Vonno sempe 'e cchiù:
tutte 'e state cunfinante.
'A Russia, 'a Cina, ll'America,
ll'argiento, ll'oro, 'e bbrillante.
Sott'ê bbumbardamente,
addó tanta ggente more,
addó pure 'e pprete
alluccano p' 'o dulore,
arme 'e mmunizione
nun s'avessan'a mannà:
senza pistole e ffucile...
comme se fa a sparà!
Faccio troppe dumande:
pecché accussì hadda ghjì.
Nce stanno 'e cumannante:
...e ddicimmo "signorsì."
Avimm' 'a suppurtà...
tanta nfamità e ttuorte,
po' saglimmo mparaviso
e ppariammo cu 'e muorte.
No, io nun so' d'accordo
aggi' 'a polemizzà:
i' stongo ncopp'â terra,
'o paraviso 'o voglio ccà.
Te stimo mio signore,
hê fatto nu capolavoro;
però na cosa ll'hê sbagliata:
hê fatto a ttutte 'o core.
Si mpietto a cchi è nfame,
nce mettive na vreccia
'a ggente se n'accurgeva;
ca se trattava 'e na feccia.
Mmece hê dato a ttutte,
nu volto bello, umano:
come si chesto abbastasse,
p'essere bbuone crestiane.
E ppo' chi mme dice
ca mparaviso so' premiata:
Sicuramente pure llà
c'è starrà 'o raccomandato.
I' penzo ca ô mmassimo
m'attocca 'a curuncina 'e alloro.
Comme sempe ô malamente
avarrà 'o posto d'onore.
Pure llà, a cattivo gioco
s'avarria fa' bbuon viso:
'o meglio posto spettarrà
a cchi tene 'e sante mparaviso.
Ntanto nuje ccà abbascio
avimm' 'a patì ll'inferno:
suffrimmo e ggiuimmo
aspettanno 'a vita eterna.
E i' ca so' ccucciuta, testarda,
curiosa...e vvoglio sapé...
...nun faccenneme capace...
continuo âddimannà: "pecché?"

Mmiez'a ttanti ccose ca tu mm'hê lassato,
nce sta 'st'immagine tutta cunzummata.
Nu bbellu juorno mme diciste: "t'aggi' 'a lassà,
però ccà nun torno cchiù...nun maspettà."

Comm'a n'arbero ca manu mano se sfronna,
a nu poco â vota perdiste tutte 'e ffronne.
Era na notte 'e vierno, 'o friddo mme ggelava,
nterra e ncopp'ê ccase nce steva tanta neve.

Ll'arbere erano sicche e ssenza foglie
e ppure tu cadiste d' 'o ramo lieve lieve.
Comm'a nu sciuocco janco svulazzaste,
po' t'appujaste nterra comm'a nu bbucaneve.

Mo te sento ncuollo 'int'o sole quanno coce,
mentre m'accarizze 'a faccia doce doce.
Te sento dint'ê vvoce 'e chesti ccanarie,
mme pare 'e te vedé vultiggià pe dint'a ll'aria.

Quanno scioscia 'o viento mme sento tuculià,
è 'a mana toja ca 'e capille me sta âccarezzà.
Ê bbote si mme piglia forte 'a pucundria,
pe nun mm'ammalincunì parlo cu tte.

Illudenneme ca tu mme staje a ssentere,
m'immagino ca staje ancora ccà cu mme.
Accussì te conto tutte 'e fatte d' 'a jurnata:
ê bbote me pare 'e sentere na resata.

Te dico ca 'a poco è ttrasuta 'a primmavera
e ll'aria s'è fatta bbella e mprufummata.
Te parlo d' 'a rusella rossa ca germoglia,
e pprutegge 'o bbucciuolo sujo c' 'e ffoglie.

Nun saccio si mme siente quanno te parlo.
ma 'a quanno te nne si' gghiuta chella sera,
spisso mme capita e nun riuscì a ttruvà pace;
pecché tenco p' 'a capa troppi penziere.

Allora pe cunfuorto t'appoio ncopp'ô core mio
e pprovo sullievo parlanno cu 'sta fotografia.

È ttrasuto Maggio...'o mese d' 'e rrose...
'o mese d' 'a frennesia, 'o mese d' 'e spose.
Ll'aucelluzze ncielo accordano 'e vvoce,
pe cantà canzuncelle aggraziate e ddoce.
'O sole abbraccianno 'a terra lle dà nu tepore,
ca delizia, ascarfa e nzuccherea ogni ccore.
Fravulelle e ccerase fresche e zzucose,

'e russo tegneno tutte 'e vvocche carnose.
Ogni nnammurato 'e passione se nfiamma.
Germoglia 'o sciore 'int'ô ventre d' 'a mamma.
Ogni angelo veglia ogni nninno ca sonna.
'O cielo è cceleste comm'ô velo d''a madonna.
Quanno trase Maggio...'a festa d' 'o culore,
'a natura schiuppanno...se veste d'ammore.

Se va annante a bbotta 'e stiente,
quanta sfuorze s'ha nna fa'.
Ogni gghiuorno astrigne 'e diente:
ma che nne parlammo a ffa'.
Quacche ddenaro 'int'ê ssacche,
nun abbasta, è ttroppo poco:
nce sta sempe chi fa fatica
a mmettere 'a tiana ncopp'ô ffuoco.
Comm'a mmo, pure tiempo fa,
'a ggenta povera nce steva;
però era semplice e ggentile,
pure poco...ma t' 'o ddeva!
Ma chille erano ati tiempe,
tiempe 'e tantu tiempo fa...
ma mme pare ca 'sta canzona,
ll'avimmo sentuta ggià.
Chi 'a vó cotta, chi 'a vó cruda,
chi abbruscata e cchi al dente.
E ttu hê 'a fa' ciento spartenze,
pure si nun tiene niente.
Tutte correno, vanno 'e pressa.
tutte ncerca 'e na fatica.
È nu viavaje 'e crestiane,
dint'ê strate, mmiez'ê viche.
Se nne parla sempe assaje,
d' 'a civiltà, de 'o progresso,
ma sulo poche s'arricchisceno:
'e povere so' ssempe 'e stesse.
Curre, fuje, faje chesto e cchello,
nun 'o perdere chistu treno
e ttu curre e mmagne povere,
annante e arreto comm'o scemo.
Sparte 'e cciocele ca te danno,
cu cchellu ppoco 'e penzione.
Chesto a tte, chello a chill'ato,
chiste so' 'e sorde pe 'o pesone.
Ccà nce sta na cosa 'e sorde,
pe 'a vesta nova 'e Nanninella.
Chiste so' p' 'e llente 'e mammà.
chest'ato p' 'a scola d' 'a nennella.
Chesto a cchillo, chesto a tte,
nun rummane niente a mme.
Faccio 'e cunte e nun me trovo,
vaco assummanno e ddividenno.
Chesto a isso, chesto a essa
e a mme nun rummane niente.
Ogni gghiuorno se fa 'a guerra
senz'arme e mmunizione.
'A currea s'è ccunzummata,
a bbotta 'e astregnere 'o cazone.
"Capo masto c'aggi' 'a fa'.
Qualunque cosa stongo ccà.
'O ssapite, nce sta 'a crisi,
'a fatica...nun ce ne sta."
'A risposta è ssempe 'a stessa,
sempe e ssulo chella llà.
Se va ncerca 'e nu lavoro,
e ppe ttramento ca t'affunne,
senza manco 'o salvaggente,
te nne vaje a ll'atu munno.
Chesto a cchillo, chesto a tte,
nun rummane niente a mme?
Spisso chiagno, ê vvote rido,
quacche vvota m'allamento,
ma po', comme spisso succede,
vaco annante a bbotta 'e stiente.
Faccio 'e cunte e nun me trovo,
ma campo sempe onestamente;
e ppo' 'a vita è ttroppa bbella,
ma nun sempe è ddivertente.
Però cammino cu 'a capa aizata,
senza scuorno, mmiez'â ggente.
Ntanto faccio quacche ssuonno,
m'accuntento e ppe ttramento,
cammino cu 'e scarpe cunzummate,
cu ddint'ê ssacche...poco 'e nniente.

Tengo n’anema 'e legno ca mme dà sustegno.
Campo d'aria e stongo sempe ncartato.
Pare mbriaco pecché vaco trabballianno,

però songo semplice, modesto e aggarbato.
Cchiù ncoppa saglio, cchiù meglio me sento.
Songo assaje leggiero e pparlo c' 'o viento.

Si mme daje spavo e aveto mme faje vulà,
po' vide quanto luntano te faccio guardà.
Redimmo, pazziammo e nzieme po’ vulammo.

Curimmo, cadimmo e allere po' ce aizammo.
Si te do filo 'a torcere quanno sto arravugliato,
ce mettimmo a ridere, allere e accartucciate.

Festosamente, corro appriesso a tutte quante:
'e ccriature redenno me guardano esultante.
Tutto mascherato faccio corze miez'ê prate,

so' carta culurata dint'a mmaggine mmentate.
Chi mme vo' farfalla, chi sciore, chi dragone.
Songo nu spassatiempo: i' songo ll’aquilone.

Che vvo' chesta lunella birichina,
c'accumpare 'int'ô scuro quann'è nnotte:
è nu lampione ca ncielo s'appiccia
e t'abbaglia comm'a cciento cannelotte.

'A llà ncoppa splennenno s'affaccia:
si 'a fisse pare ca te guarda nfaccia.
Te fa ll'occhiolino, nu vasillo te dà
e ogni ccore nnammurato fa suspirà.

S'avvanta 'sta lunella spucchiosa...
orgogliosa s'appiccia e s'allumma.
Cu nu gruosso penniello pitta 'o mare
e cculora cu ll'argiento 'o lago, 'o sciumme.

Quanno ê vvote se mette 'e travierzo,
va scutulianno 'e vvele d' 'e vvarche.
Ogni mmarenaro fa fatica a ttira 'e rrezze,
pe ttramento c' 'o carico 'e pesce se mbarca.

Che ddice 'sta lunella appassiunata,
quanno 'int'ô scuro te porta n'ammasciata.
Te fa venì a mmente 'e suspire, 'e pparole
'e quacche ppassione ca tiene 'int'ô core.

Che vvo' 'sta luna ntristita e spirciusella,
ca se ncupisce quann'o tiempo è bbrutto.
Se mette nfaccia nu gruosso farzuletto,
ca manu mano 'e llacreme ll'asciutta.

Che vvo' 'sta luna a fforma 'e cunnulella
ca quanno dorme se fa vucà da 'e stelle.
Che vvo' sta luna tonna tonna e cchiena,
sciasciona e bbella quanno se fa grossa.

Nun appena nu raggio 'e sole ll'allumma
s'appiccia, se nfervora e sse fa tutta rossa.
Ncopp'â strata triste, scura e ssulagne,
'a luna fa 'a sentinella: osserva e vveglia.

Ntanto n'omme triste, scunsulato e mbriaco
ca pe ccumpagnia tene sulo na bbutteglia,
se guard' 'o mare cu ll'acqua lucente e bbruna
e ncantato se mmirà 'o cielo cu ddoje lune.
"

'A casa senza mamma è nu camino senza fuoco,
na funtana secca, na pazziella senza juoco.
Na connola senza ninno, nu cielo senza sole,
na mammella senza latte, nu pietto senz'ô core.

'A mamma p'ogni ffiglio tene na bbona parola:
pure si nun ha studiato 'o fa na bbella scola.
Nun è mmiedeco, nfermera...ma te sape curà.
Nun ha aggirato 'o munno...ma te sape guidà.

Nun è na cunferenziera...ma te sape parlà.
Nun è nu cardellino, però sape cinguettà.
Nun è ffata, né mmaga, ma te sape ammalià.
Nun è nu faro, ma 'e notte te sape illumminà.

Tutto chello ca tene...si po'...essa t' 'o ddà,
...si pure tene poco, a tte ne dà 'a mmità.
Pure si 'e tanta cose nun tene cunuscenza,
p' 'o figlio sujo addeventa ll'arca 'e scienza.

Sta vicino a tte...e si pure staje luntano,
sempe te prutegge e tte tene p' 'e mmane.
Pure si 'o ffiglio sujo è nu granne scellerato,
essa 'o perdona sempe 'stu figlio disgraziato.

Te sta sempe accanto, sta llà vicino a tte,
te sape sta' appriesso senza darlo a vvedé.
P' 'o figlio sujo se jetasse dint'ê ffiamme.
Che granne tesoro è 'o bbene 'e na mamma.

Mme sento na tristezza nfunno ô core,
ca mme ncuieta e mme porta pucundria.
Nun saccio che d'è chesta amarezza,

chest'afflizione, chesta malincunia.
Sarrà ca penzo ô cielo quann'è ggrigio
e rregne 'e nuvole scure ll'orizzonte.

Saranno ll'anne mieje ca vanno fujenno
e i' 'e nvecchià...nun me sento pronta.
Sarrà 'stu forte addore 'e primmavera

che a ll'intrasatto accumpare preputente.
Sarrà c'ogni ccosa cresce, pasce, more;
ma accussì hadda jì e nun se po' ffa' niente.

Sarrà 'a paura 'e chello ca vene dimane
e io nun saccio pe qquantu tiempo ancora,
pozzo vedé 'o mare, 'o cielo, 'e stelle, 'a luna,

'o sole ca tramonta, 'a nascita 'e ll'aurora.
Accussì mme succede ca senza vulé,
mme piglia 'a malincunia e nun saccio pecché.

M'abbastasse ca senza dicere tanta parole,
quaccheduno mme parlasse core a ccore.
Appujann'a mana nfaccia cacciasse 'a tristezza
e i' stesse meglio: ê vvote abbasta na carezza.

'O pueta è nu sognatore visionario,
sta sempe cu 'o naso a gguardà ll'aria.
Mmiez'ê nnuvole tene nu castello,
pe suffitto nu cielo chino 'e stelle.

Pe ffeneste tene curnice chine 'e viole,
'a do' traseno e jesceno 'e pparole.
Pe pparete tene cristalle sfaccettate,
che rifletteno 'e culure 'e ll'estate.

Ncopp'ô tavolo tene calice argiento,
'a do' surzea ammore e ssentimento.
'O pueta è nu mago prestigiatore...
tanta cose piglia 'a 'int'ô cappiello:

nu raggio 'e sole, 'a luna rossa, na stella...
nu cardillo, nu cuniglio c' 'o mbrello.
Int'â ll'anema tene nu furziere,
addó tene astipate mille penziere.

Tene 'a casa chiena 'e strumiente,
ca sona a ssiconda d' 'o mumento.
Quann'è triste sona na chitarra stunata,
ma quanno sona cu nu pianino ntunato...

'e llettere volano ncielo, po' bbello e bbuono
se metteno nzieme e mmentano na canzona.
Tene tante armadie cu gruosse terature
chine 'e parole...e ccore russe nfacc'ê mure.

'Int'ê scanzie tene pennielle e mmatite:
lle serveno pe culurà 'e fatte d' 'a vita.
Quann'e notte 'o scuro fa accappunà 'a pelle
isso nce mette 'a luna e mille llucelle.

Quanno 'e nnuvole minacciano n'acquazzone
isso cu pastello giallo disegna 'o sole lione.
Che fa 'o pueta quanno lle vene 'a pucundria?
Aiutandosi cu ll'ammore e 'a fantasia...

piglia pe mmano 'a tristezza e ll'amarezza
cerca 'e trasfurmà chella ca vede nbellezza.
Che ppo' ffa' nu pueta, ma c'ha dda fa':
cerca 'e culurà 'e rosa 'o ggrigio ca ce sta.

Piglia tutte 'e llacreme appassiunate...
'e ccoglie...e 'e ffa addeventà rugiada.
Quanno 'a vita 'o culpisce c' 'a mana smerza,
pe s'accujetà se scrive quacche verzo.
"

Scenne lenta lenta, chianu chiano:
nu' lle piace pe nniente e fa rummore.
Ncopp'a ogni ccosa mette 'e mmane
e vva pittanno 'e janco chello ca trova.

Lle piace e cummiglià cu na carezza,
'e ccase, 'e scianche d' 'e mmuntagne.
Mentre nisciuno sente essa scennenno,
va culuranno arbere e ffoglie sulagne.

'E rrenne e ttante animale dint'ê bosche,
passanno lassano orme ncopp'ê mante:
pareno fine merlette d' 'e ffate arricamate,
cu ffelille 'e zucchero doce e abbagliante.

Vugliosa e fremmenno assaporo 'a neve,
nu tremmulio mme trase dinto cucente.
Nu ciuocco mme vasa a faccia lieve lieve,
sento nu brivido: ma 'e ppassione, nun è freve.

'O core è nu carillon russo ntarsiato d'oro:
chino chino 'e tesore 'e granne valore.
È nu maestro d'orchestra cu 'e musicante,
ca sonano sinfonie quanno 'o core canta.
È nu scrigno addó aneme bbelle, cherubine,
pizzicanno 'e ccorde e viole e vviuline...
portano ncielo mille note appassiunate,
pe sunà mparaviso cante p' 'e nnammurate.
'A frennesia, 'a passione e ll'ammore,

so' tutte 'e strumiente c'adopera 'o core,
pe te fa parlà cu 'o bbrillio 'int'a ll'uocchie,
quanno pe ll'emozione t'ammancà 'a voce...
pe te fa dicere chello ca nun saje dicere,
quanno triemme d'ammore e 'o cuorpo coce.
Che ffa 'o core quanno s'appassiona?
Te sbatte mpietto e addeventa canzone.
Che ffa 'o core quanno sta nfantasia?
Te fa scrivere vierze e addeventa poesia.

Cagna tutte 'e juorne 'o sciardino d' 'a vita:
schioppa na rosa, se sfronna na margherita.
Nce sta frutta acevera, bucciuole spucchiose
e ttanta frutta ammatura, bbona e zzucosa.

Pe ttramento ca nu germoglio 'e rosa nasce,
na foglia ngialluta e stanca 'o ramo lassa.
Ogni gghiuorno 'stu sciardino cagn'aspetto:
se spoglia, po' 'e sciure nuove se mbelletta.

Quacche ffoglia ncopp'ô ramo rummane,
quacch'ata cade nterra senz'aspettà dimane.
Quanno 'o sole splenne 'int'a 'stu sciardino, sonano 'e ccampanelle, cantano 'e cardelline.

Quanno mmece chiove 'o scenario cagna:
se seccano 'e rame, 'o crisantemo chiagne.
Ntanto ca se nasce, se campa e sse more,
appassisce na foglia, nasce nu nuovo sciore.

È nu paraviso nterra esposto ô calore, ô ggelo,
cu arbere prufummate c'accarezzano 'o cielo.
Quanno po' quacche pianta se fa vecchiarella,
lassa 'stu sciardino e vva ncielo a ffa' 'a stella.