Club Poetico

Comme corre e ffuje 'a vita,
spisso 'int'ô mmeglio te lassa:
pure si vede ca t' 'a spasse,
te strattona e tt'arrepassa.
T'abbandona bello e bbuono,
senza te cercà 'o permesso,
se nne va a ll'intrasatto,

lassannete comm'a nu fesso.
'A morte cazzimmosa aspetta...
nun se trova maje llà pe ccaso:
bburiosa e ppretenziosa,
te leva 'a vita 'a sott'a 'o naso.
Pure si vaje cuonce cuonce,
e ffaje sulo poco rummore,

arricriannete e gustannete
d' 'a vita ll'addore, 'o sapore;
essa sta ggià llà acquattata...
t'afferra, te piglià e ddice:
"'Sta vota attocca a tte"
E ttu comme 'a cuntraddice!
Nun lle daje cunfidenzia...

ma quann'essa s'è ncurnata,
pure si faje resistenza;
int'a nniente t'ha afferrato.
Può ffa' pure carte faveze,
'o bbuffone, 'o smargiasso,
cu essa nun può ddicere:
"va bbuono... 'sta vota passo."

Può avè tutte 'e rragione,
cu essa haje sempe tuorto,
quanno vene e sse ncorna,
'int'a nniente tu...si' mmuorto.
Pecché essa è na nfamona,
nsulente e ccazzimmosa:
nun lle fa' specie niente;

manco 'o cchiù 'e ogni ccosa.
Può ttenè pure 'e bbrillante,
chello ca costa cchiù caro:
anfore, casce 'e rubbine,
diamante e pperle rare.
Nun lle mporta comm'è 'a pelle,
quanno tu si' bbrutto o bbello,

si hê cammenato pare pare
o si hê fatto o paro e 'o sparo.
Può ttenè assaje sorde:
sott'a 'o lietto, 'int'ê bbuatte,
tutto ll'oro d' 'o munno:
cu essa no, nun scinne a ppatto.
Quanno passe chella porta,

si' ggeneruso o si' avaro
si' straricco o puveriello...
...nun te servono 'e denare.
Chello ca nvita hê guadagnato,
mbruglianno o cu onestà;
quanno trase a ll'atu munno,
nun te serve...ll'hê 'a lassà.