Club Poetico

'O core è nu carillon russo ntarsiato d'oro:
chino chino 'e tesore 'e granne valore.
È nu maestro d'orchestra cu 'e musicante,
ca sonano sinfonie quanno 'o core canta.
È nu scrigno addó aneme bbelle, cherubine,
pizzicanno 'e ccorde e viole e vviuline...
portano ncielo mille note appassiunate,
pe sunà mparaviso cante p' 'e nnammurate.
'A frennesia, 'a passione e ll'ammore,

so' tutte 'e strumiente c'adopera 'o core,
pe te fa parlà cu 'o bbrillio 'int'a ll'uocchie,
quanno pe ll'emozione t'ammancà 'a voce...
pe te fa dicere chello ca nun saje dicere,
quanno triemme d'ammore e 'o cuorpo coce.
Che ffa 'o core quanno s'appassiona?
Te sbatte mpietto e addeventa canzone.
Che ffa 'o core quanno sta nfantasia?
Te fa scrivere vierze e addeventa poesia.

Cagna tutte 'e juorne 'o sciardino d' 'a vita:
schioppa na rosa, se sfronna na margherita.
Nce sta frutta acevera, bucciuole spucchiose
e ttanta frutta ammatura, bbona e zzucosa.

Pe ttramento ca nu germoglio 'e rosa nasce,
na foglia ngialluta e stanca 'o ramo lassa.
Ogni gghiuorno 'stu sciardino cagn'aspetto:
se spoglia, po' 'e sciure nuove se mbelletta.

Quacche ffoglia ncopp'ô ramo rummane,
quacch'ata cade nterra senz'aspettà dimane.
Quanno 'o sole splenne 'int'a 'stu sciardino, sonano 'e ccampanelle, cantano 'e cardelline.

Quanno mmece chiove 'o scenario cagna:
se seccano 'e rame, 'o crisantemo chiagne.
Ntanto ca se nasce, se campa e sse more,
appassisce na foglia, nasce nu nuovo sciore.

È nu paraviso nterra esposto ô calore, ô ggelo,
cu arbere prufummate c'accarezzano 'o cielo.
Quanno po' quacche pianta se fa vecchiarella,
lassa 'stu sciardino e vva ncielo a ffa' 'a stella.

'A vita è na cannela, se cunsumma manu mano:
'o muoccolo se stuta 'int'ê mmane chianu chiano.
Ô pprincipio 'a sciamma è nu bellu fuoco ardente,
te cuoce quann'a tuocche: è fforte, preputente.

Corre e ffuje 'o tiempo, 'a miccia se cunzumma
e llassa 'int'a ll'aria ll'addore agre d' 'o fummo.
Ntanto ca pienze ô passato, a cchello ch'era...
'e nnotte, 'e juorne passano...e llenta cola 'a cera.

Comm'a 'e spiecche songhe ll'uocchie,
quanno te guardano nsistentemente:
te traseno nfino a ddint'a ll'anema,
fotografano chello ca tiene 'int'a mente.

Uocchie verde, celeste, chiare, scure:
triste, allere...uocchie 'e tanta culure!
Uocchie malinconiche cu 'e cciglie nfose,
meste e ttriste comm'a nnuvole picciose.

Uocchie adulatore, uocchie ruffiane,
uocchie sfacciate, uocchie puritane.
Uocchie busciarde, uocchie d'attore:
ca lusingano, ma nun provano ammore.

Uocchie addiruse, uocchie paunazze:
uocchie ncazzate...uocchie 'e pazze.
Uocchie scurnuse ca diceno bbelle parole
e acalano 'o sguardo pe scuorno o pudore.

Uocchie cuntente, ca rideno allere,
uocchie busciarde, uocchie sincere.
Uocchie nire comm'ô ccarbone cucente,
ca s'appicciano comm'ê tizzune ardente.

Uocchie 'e mamma addó se vede 'o core...
ca quann'addentano fridde e ssenza calore,
s'alluntanano dicenno: "vaco s'è ffatto tarde..."
primma e se nzerrà te lassano ll'urdemo sguardo.
Giovanna Balsamo

Ogn'anno venco d' 'a Lapponia a vve truvà:
so' Bbabbo Natale, chesto mme piace 'e fa'.
Sotto Natale mme piazzo ncopp'ô slittino
e pporto tanti regale a grande e piccoline.
Ncuollo tenco nu vestito nu poco scagnato:

mme va astritto pecché mme so' ngrassato.
Ogni anno m'arrivano migliaia 'e cartuline:
'a tutt'o munno me scriveno tanta letterine.
M'aggio mparato 'a calligrafia 'e uno, 'e n'ato:
'a vista nun tanto m'aiuta...pe ll'età avanzata.

Però aggio ricunusciut'a scrittura d'Annarella:
nun vo' cchiù 'a pupata...mo vo' na nennella.
Chesta c'addora 'e rose è 'a lettera 'e Cuncetta;
forze me scrive pe mme cercà n'ata vurzetta:
"Babbo Natale nun me purtà 'a stessa cosa...

chist'anno si può, vulesse nu bbellu sposo."
Chi mme cerca pazielle, chi vo' nu diamante,
chi vo' na connola, chi nu marito, chi ll'amante.
Mmiez'a tante ce sta na lettera accartucciata:
p' 'e ttroppe llacreme è nfosa e mmaldrattata.

Ll'ha scritta 'a povera Teresenella; è disperata:
pe Natale vulesse ancora 'a mamma e 'o pate.
Chi vo' na vita bbella e ssenza patimente,
chi vo' 'o ppane, chi mme cerca 'e diente!
Chi ha perzo 'a fatica e nun 'a riesce a ttruvà,

chi vo' assaje denare pe ffa 'a vita d' 'o pascià.
Ma i' che pozzo fa', vengo na vota a ll'anno,
si 'o pputesse fa', jesse sempe vulanno,
p'aiutà 'a ggenta povera e cchiù bbisognosa:
a cchi n'ave bbisogno 'o desse ogni ccosa.

Pe na vota voglio cercà i' a vvuje nu piacere:
v'aggio lassato na lettera llà, sott'ô bbicchiere.
So' pparole senza gnostro, frutto d' 'a fantasia:
so' pparole ca portano nu pucurillo d'alleria.
'E ssape leggere sulo chi tene generosità

e riesce a ttruvà 'o modo justo pe ccunfurtà.
Rialàte ammore, nisciuno s'avess' 'a ntristì:
criature e anziane nun avessan' 'a maje suffrì!
Purtate pace e ggioia p' 'e ccase, p' 'e spitale,
Donate tranquillità e sserenità, comme rialo.

Si po' vulite c' 'a surpresa è cchiù speciale,
dicite ca v'aggio mannato i'...Papà Natale.

È na parola ca te mpare a ddicere
doppo pochi mise ca si' nnato.
Nun te ll'hê mparà a scrivere,
né a leggere: nasce ggià mparato.

Nun è nnecessaria 'a traduzione,
nun tene bbisogno 'e spiegazione.
S'ausa spisso...è cchiena 'e vita.
sape 'e bbuono: è ddoce...sapurita.

È na parola tarmente facile,
ca nun s'ha dda manco studià.
P' 'a dicere nun hê essere strologo
e nun hê essere bravo a pparlà.

Però te dà nu calore, nu cunfuorto,
n' emozione ca nun se ponno spiegà.
È na parola, ma pare n'abbraccio:
è cchiena d'ammore e umanità.


È na parola ca se dice c' 'o core,
chiena 'e sentimento, chiena d'ammore.
P' 'a dicere nun ce vo' 'sta granne abilità:
è facile, ognuno sape dicere "mammà."
Giovanna Balsamo

Tiene na faccella pezzerella pezzerella,
ca mme trase tutta quanta 'int'a na mana.
Mme guarde, ride cu 'st'uocchie vicchiarielle,
ca nun ponno guardà cchiù tanto luntano.

'Int'ê capille puorte nu farzuletto culurato:
'o stesso ca purtave ncapa 'a ggiuventù.
Mme guarde e rride cu na vocca senza diente:
te so' ccadute e nun cresciarranno cchiù.

'Int'a ll'uocchie tiene tutta ll'innocenza
'e chi nun sape che vo' dicere a ffa' male.
Tiene 'a stessa limpidezza e ttrasparenza
'e chi se riflette 'int'a nu specchiale.

Mme guarde cu 'sta faccella 'e nenna,
ca 'o tiempo fujenno t'ha strupicciato.
Ll'anne so' ppassate e ttu te si' fatta tantella:
comm'a na criaturella...mo si' addeventata.

Te piglio pe mmano, tu mme viene appriesso
e rride cuntenta: si' ffelice 'e mme vedé.
Mme vien'arreto comm'a qquann'io criaturella,
e ppezzerenella currevo appriesso a tte.

Mme guarde 'o naso, 'a vocca, 'o viso...
tutta cuntenta mme dice ca t'arrassumiglio.
Po' veco 'int'ê cciglie ca na lacrema te sponta:
vedenneme pruove ancora tanta meraviglia.

M'abbracce e astrignenneme forte triemme,
'int'a ll'uocchie tiene appicciata na sciamma.
Over'è, fra tanti core tuoste, core 'e preta:
'o cchiù bello è sempe 'o core 'e mamma.

M'aggio fatto dduje cunte, a uocchio e ccroce,
forse...fosse meglio si muresse a Nuvembre.
Nun me va bbuono Luglio...è ttroppo cauro:
o fosse meglio si mme ne jesse a Settembre?

No, Settembre nun è ccosa, manco se po' ffa':
'o tiempo è ancora buono, 'a gente a mare va.
'O mese Austo? E chi mme vene appriesso:
nun ce sta rifrisco a ll'ombra d' 'e cipresse!

A Ggennaio fa friddo, ognuno se rincresce:
chiove, maletiempo fa...nun tanto se jesce.
Sotto ê ffeste 'e Natale? Manco a nne parlà:
stanno tutte quante ndaffarate a ffesteggià.

'O mese 'e Marzo? E no...llà manco è ccosa:
miette ca ô tiempo lle piglia 'a pazzaria...
se nfonna tutta quanta 'a casciulella mia?
'O mese 'e Aprile...no, no, manco va bbuono:

ogneduno piglia suonno a cchella staggione.
Nun se putesse fa' ca fra ll'aneme trapassate,
se putesse vuttà 'sta morta mia int'a scurdata?
Fosse meglio si muresse 'e juorne d''e muorte;

si tutto fila liscio e si quaccosa nun va stuorto!
Accussì jesse bbona i' e tutte quante ll'ate:
mmiez'a ttanta muorte i' stesse ggià priata!
Fra chi se chiagne 'o marito, chi 'a muglieria,

na lacrema pe mme ce jesce: almeno spero!
Quanno sarrà nun attaccate c' 'a solita litannia,
dicenno ch'ero brava: sparagnateve ll'ipocrisia!
Na parulella però, accussì 'e pressa 'e pressa,

si overo tenite voglia, dicitammella 'o stesso!
Senza esaggerà e mmentre priate a Mmaria,
fra na preghiera e n'ata, dedicateme na poesia.
Pe mmo...sto' ancora bbona...e ggrazie tante:

cu ll'aiuto 'e Ddio e d' 'e sante vaco annante.
Ma fosse bbello si quann'essa allong'a mana,
lle putesse di': nun tenco genio mo, passa dimane.

‘N’addumanna m’’e bbalenata ‘ncapa,
tenenne mente ‘na processione:
quanti apriesso ‘a ll’assequie ce vanno
pecchè se sentono ‘e ce ‘sta,
sentenne dispiacere pe’ chi
‘sta dinto ‘a cascia ‘e lignammo
facennese ll’uddimo viaggio,
primm’’e fernì sotto sette palmi,
‘e nu stanno facennese sul ‘na passiata?
Miezo ‘e primme filere, quasi sempe,
so’ lacrime ‘e afflizione genuine, pe’ carità!
Nun me permetto ‘e dicere ‘o cuntraio.
Ma quanto chiù areto vaje
te v’’a zumpà ’a ll’uocchio
ca chi ‘sta là ce ‘sta pe’ cumparì.
Ll’anema ‘e chillu poverello
‘o chella poverella, ‘e turno, nu sulo
‘sta ‘a s’arraggià, vedenne
chelle ca fuine ‘e carne soie
chiuse strinto e ‘o scuro, tiseche,tiseche,
m’adda sentì chilli quatto scriteriati
ca chiacchiereano d’’e cose lloro
e stanno là sul pe’ cumparenza.
I’ ‘o restarraggio ditto, primmo
‘e caccià ll’ultimo ciato,
ca ‘ncoppo ‘e manifesti
c’adda starrà scritto, grusso,
‘e parole ca seguono:
nu v’appresentate
sì ata fa torcere into ‘a panza
ll’anemella mia, pecchè, v’’o ggiuro,
ca venarrà ‘a notte abbecino ‘o lietto
e dispietto dopo dispietto
‘na mala nuttata vi farà passà.

         ‘O iuorno
Dint’’o  spécchio ‘e mare,
ca ‘fonn’’e scogli, addò,
‘ncoppo, sorge ‘a chiesa
d’’o ossercurso a Ischia,
vurria, chillu iuorno
ca se sarrà cunzumata
’a cannela d’’a vvita,
ca ‘e cennere meie
fosseno iettate. Senza
chiante e sciallaquà sciure. Sulo
‘na cosa addumanno, ‘a chi
chi m’’a vuluto bbene: ca vene là,
ogni tanto, pe’
‘na piscata e ‘na prearia.

      ‘O vvino malandrino
Trequarti ’e cancella penzieri,
nu russo ca pare velluto,
‘ntramente se ‘ntrattene
int’’o cannarone.

Trequarti ’e cancella penzieri,
ca doce me fanno tracullà,
fino ’a quanno
nu me addubecheo.

Trequarti ’e malandrino,
‘n aglianico ’mbruglione,
ca ‘nzieme ‘e penzieri
‘o male capa me lassa.

‘A vvita è  nu tiatro,
addò va ‘nscena ogni
tipe ’e rappresentazione;
chiù uno ne tene
chiù ne mette. ‘Na recita
‘a cielo apierto, senza
paganti. Nu sulo atto,
addò ‘e recitanti nu teneno
scole pe’ ‘mparà ‘a lezione,
né pruvessuri ca sanno ‘nsegnà.
Se recita senza cupione,
sì pure scene ‘e bbattute,
‘a vvote, pareno già scritte
d’’a ’o destino, ca se sape,
ca è, pe’ nnatura,
scurnacchiato patologico.

Ah, sto' cchiena
'e dulure stammatina...
quase quase mme
piglio n'aspirina.
Tenco pure nu poco
'e male 'e panza:
forze tenco
quacche intolleranza.
Eccì, eccìù, e..ccià,
aggio fatto ciento starnute:
si vaco annanze accussì,
so' ggià pronta p' 'o tauto.
Uh Madonna mia
comme sto' ccumbinata,
stammatina pe mme muovere
nce vo' nu carrarmato.
Aggio fatto nu colpo 'e tosse,
mme so' asciute ll'uocchie 'a fore.
Tenco nu dulore forte mpietto,
niente niente fosse 'o core?
Salute a vvuje
e pparlanno cu ddecenza,
nun vaco bbona 'e cuorpo:
tenco nu poco 'e flatulenza.
'O core fa pu ppù,
nun ce 'a faccio cchiù.
Quanno saglio 'e scale
mme vene ll'affanno:
tenesse ll'enfisema
o quacch'atu malanno?
Quanno respiro faccio
'o siscariello,
ma fosse nu poco
'e brunchitella?
'O duttore dice
ca nun m'aggi' 'a preoccupà,
tenco nu male comune:
sono affetta da anzianità.
Passata 'a sissantina,
è nu dulore ogni mmatina.
Quanno 'o tiempo passa,
è nu terno a llotto:
si po' facimmo 'a tombola,
allora sparammo 'e bbotte.
Simmo tanta nummarielle
ncopp'a cartella d' 'a vita:
ogni ghiuorno ca passa
pazziammo na partita.
Quanno sott'ô traguardo
simmo quase arrivate,
jammo sempe cchiù llente:
senza sciato e affannate.
E allora nun fa niente,
accussì vaco annanze:
nu poco zuppechianno
e nu dulore 'int'ô scianco.
Pe mme chello ca conta
è cca arrivo nfin'a llà:
quase â fine d' 'o percorso,
senza tanto spapetrià.
Nun me mporta si spisso
mme fanno male 'e rine.
Si tenco 'o core pazzariello
e nu poco ballerino.
Si quacche vvota,
tremmo c' 'a mano.
Si pure cu 'e llente,
nun veco bbuono 'a luntano.
E nnun voglio penzà
a qquanno vaco
a ffernì 'int'ô puzzo:
d' 'o calice d' 'a vita
mme voglio bbere
nfin'a ll'urdemo surzo.
Quann'essa vene
e annanz'â porta fa "drin drin",
i' aizanno 'o calice, saluto...
po' faccio ll'urdemo bbrinnese: cin cin.

Se va annante a bbotta 'e stiente,
quanta sfuorze s'ha nna fa'.
Ogni gghiuorno astrigne 'e diente:
ma che nne parlammo a ffa'.
Quacche ddenaro 'int'ê ssacche...
nun abbasta, è ttroppo poco:
se fa sempe cchiù ffatica
a mmettere 'a tiana ncopp'ô ffuoco.
Comm'a mmo, pure tiempo fa,
'a ggenta povera nce steva;
però era aiutata, cunfurtata:
pure cu ppoco nce 'a faceva!
Ma chille erano ati tiempe,
tiempe 'e tantu tiempo fa...
ma mme pare ca 'sta canzona,
ll'avimmo sentuta ggià.
Chi 'a vo cotta, chi 'a vo cruda,
chi abbruscata e cchi al dente.
E ttu hê 'a fa' ciento spartenze,
pure si nun tiene niente.
Tutte correno, vanno 'e pressa.
tutte ncerca 'e na fatica:
è nu viavaje 'e crestiane,
dint'ê strate, mmiez'ê viche.
Se nne parla sempe assaje,
d' 'a civiltà, de 'o progresso,
ma sulo poche s'arricchisceno:
'e povere so' ssempe 'e stesse.
Curre, fuje, faje chesto e cchello,
nun 'o perdere chistu treno
e ttu curre e mmagne povere,
annante e arreto comm'ô scemo.
Sparte 'e ssciuscelle ca te danno,
cu cchellu ppoco 'e penzione:
chesto a tte, chello a chill'ato,
chiste so' 'e sorde pe 'o pesone.
Ccà nce sta quacche denaro,
pe 'a vesta nova 'e Nanninella.
Chiste so' p' 'e llente 'e mammà,
chest'ato p' 'a scola d' 'a nennella.
Chesto a cchillo, chesto a tte,
nun rummane niente a mme.
Faccio 'e cunte e nun me trovo,
vaco assummanno e ddividenno:
chesto a isso, chesto a essa
e a mme nun rummane niente.
Ogni gghiuorno se fa 'a guerra
senz'arme e mmunizione:
'a currea s'è ccunzummata,
a bbotta 'e astregnere 'o cazone.
"Capo masto ch'aggi' 'a fa'.
Qualunque cosa stongo ccà."
"'O ssapite, nce sta 'a crisi,
'a fatica...nun ce ne sta."
'A risposta è ssempe 'a stessa,
sempe e ssulo chella llà.
Se va ncerca 'e nu lavoro,
e ppe ttramento ca t'affunne,
senza manco 'o salvaggente,
te nne vaje a ll'atu munno.
Chesto a cchillo, chesto a tte,
nun rummane niente a mme?
Spisso chiagno, ê vvote rido,
quacche vvota m'allamento,
ma po', comme spisso succede,
vaco annante a bbotta 'e stiente.
Faccio 'e cunte e nun me trovo,
ma campo sempe onestamente;
e ppo' 'a vita è ttroppa bbella,
pure si nun sempe è ddivertente.
Però cammino cu 'a capa aizata,
senza scuorno, mmiez'â ggente.
Ntanto faccio quacche ssuonno,
m'accuntento e ppe ttramento,
cammino cu 'e scarpe cunzummate,
cu ddint'ê ssacche...poco 'e nniente.

'O 'i' lloco ll'autunno...è appena turnato:
quanta frutta bbella e bbona ha purtato.
Frutte d' 'a staggione, noce, 'e nnucelle,
se pavuneggiano 'int'a llarghe spaselle.
Sporte chiene d'uva bbruna e jonna 'int'ê tine,
songhe bbelle e ppronte p'addeventà vino.

'O tiempo ogn'anno fa 'o cagno 'e staggione,
spanne nterra tanta foglie ggialle e arancione.
Ncuollo porta nu manto 'e passione autunnale:
nu tappeto tutto culurato 'e russo carnale.
Poco â vota 'o juorno s'accorcia sempe 'e cchiù,
'o cielo è spisso cupo, nun è cchiù ttanto blù.

Ma quanno nasce 'o sole na voce avvellutata
se sente 'int'a ll'aria fresca e ffrizzantina:
na femmena ntanto ca stenne 'o bbucato,
chiacchiarea cu ll'aria fresca d' 'a matina.
Na rundinella cu 'e sscelle nfreddulite,
se sente tutta triste, sola e spaisata:

ha dda ghji addó ll'aria è cchiù ddoce
e se nne va assaje triste e scunsulata.
Saluta a mmalincuore, nun vulesse lassà,
nun dice addio e pprumette ca turnarrà.
È notte...s'appicciano 'e lluce 'int'ê ccase,
ncielo na luna janca e ttonna fa 'a vastasa.

'Int'o fuculare s'arrusuleano 'e ccastagne
nu mbriacone ciuotto 'e vino s'appapagna.
Na fuglietella rossa d' 'o ramo se stacca,
nu cuntadino 'a legna p' 'o camino spacca.
Nu sciore vicchiariello e ttutt'appassito,
se sente sulo mmiez'ô prato sguarnito:

acala 'a capa e tutte 'e petale se scrolla,
nfin'a qquanno rrummane sulo 'a curolla.
Torna vierno, 'e ciuocche scenneno lieve lieve,
ncuorpo nu forte calore squaglia 'a neve.
Ntanto ca 'e juorne passano fra 'a matina, 'a sera
s'aspetta chella rondine ca torna a pprimmavera.