Club Poetico

Ah luna, luna, lunella...
bella, janca e ttonna...
allumma, schiarisce
e abbagliame 'e suonne.
.
Fa ca ogni ccriaturo
nun appena se sceta,
trova pace e ammore
'int'a ttutto 'o pianeta.
.
Fa ca ogni mamma,
ca p' 'o figlio sujo
lotta e ccumbatte,
tene sempe astipato,

nu pietto chin'e latte.
Fa ca vicino a ogni culla
nce sta na nunnarella,
ca canta na ninna nanna

a na bbella nennella.
.Fa ca 'int'a ogni ccasa
cresce nu criaturo,
ca tene annanze a isso

nu luongo futuro.
.Fa ca tutte ll'uocchie
abbrillano pe na cosa c'abbaglia
e nno pe nu fuoco 'e paglia

ca c' 'o calore se squaglia.
.Fa ca ogni vvocca
sarrà 'e zucchero chiena
e nun pruvarrà maje

ll'ammari d' 'o vveleno.
Fa ca ogni nnaso d' 'e mmagnolie
sentarrà sempe ll'addore,
maje fieto 'e cuorpe accise

e ccu 'e stentine 'a fore.
.Fa ca ogni mmana,
astregnarrà n'ata mana,
pecché tutte aunite

se va cchiù lluntano.
.Fa ca tutt'e 'e piede,
se nfunnarranno sulo
d'erba nfosa 'e rugiada

e nun calpestarranno
cchiù 'o sanghe
d''e cuorpe marturiate.
Fa mmodo ca ogni nnave

quanno trase 'int'ô puorto,
trova nu faro ca 'a guida
e lle dà cunfuorto.
Fa ca femmene e uommene

nun se faranno cchiù 'a guerra
e cca nce starrà tant'armunia
fra tutte 'e popole d' 'a terra.
Fa ca 'stu quarto 'e vita

ca mm'è rrummasa,
pozza essere avvellutata
comm'a na stola 'e raso.
Luna, lunella prumiettene

ca quanno arriva 'o mumento,
me purtarraje ngiro
ncopp'a nu carro argiento.
'O ssaccio, 'o ccapisco...

ca ognuno fa chello ca po' ffa',
però luna luna, lunella bbella,
vide si mme può accuntentà.