Club Poetico

'Stu ffuoco ca arde ncopp'â bbrace,
mme rammenta fatte de 'o passato,
quanno cucenno ncerca 'e nu sullievo,
muntagne scunusciute mme saglievo.
Abbruciata comm'a nu gruosso tizzone,

mme ne jevo strujenneme 'e passione,
cercanno chi m'avev' 'a appiccià,
cantavo spisso...'sta canzona ccà:
"fuoco ca m'abbruce quanno passe,
mme strapazze, arde e mme cunfuorte

saglieme vullenno dinto ê vvene,
famme abbrillà 'e luce viva ll'uocchie.
Cu 'a faccia rossa, tutt'emozionata,
pensannece mme sento ggià sturdita.
Tu sciamma ca saje ardere vvullente,

nfuocate e famme schiuppà 'e vita.
No, nun te stutà, saglieme ncoppa,
cuoceme aspettanno ca m'appiccio.
'E te nne tenco nu granne vulio:
si' nnecessario e nun è nu capriccio.

'A vocca s'è ncantata e ccant'ammore,
addeventata strumento sona forte,
mme scopre appassiunata 'e sentimento
e 'stu core mpazzuto scassa 'e pporte.
'E vvene pulsano sanghe e ppure tu,

si' ffuoco dirumpente sempe 'e cchiù.
Passiona nsanguinata ca nun mente,
sanghe vullente è vvivo, maje trasparente.
Avviluppame, atturcigliate cu mme:
fallo...senza m'addimannà 'o ppecché.

Vino e ffuoco russo, site eguale,
assaje v'assumigliate pe ccalmà.
'O core pompa sanghe e vva rruranno,
'a pelle, 'o core, 'e vvene llà vvicino,
s'ascarfano ntanto ca mme tuocche

e io mme nfoco, comme si bbevesse vino.
'E te me n'aggi' 'a fa' na panza chiena,
te voglio sentere 'e cocere nsistente.
Stamme vicino, osinò mme ne moro,
pecché senza 'stu ffuoco nun so' nniente."