Club Poetico

Quanno ll'autunno trase e ppasce
na miccia int'a ll'uocchie mme nasce.
Comm'a palomma ca 'e sscelle s'abbrucia,
vaco ncerca 'e calimma sott'â luce.

Ll'afa cavera e vvullente c'ha lassato...
'o calore cu ll'aria fresca s'è smurzato.
Muntagnelle 'e foglie marrone e rrosse,
s'accalcano sott'ê ffronne spugliate,

luongo, a lluongo nu ramo scricchiulea,
ncopp'a ogni vvia 'e ogni vviale arberato.
Mentre cammino pe 'sti strate sulagne
'a luntano sento 'o cielo 'e murmulià.

'O 'i' lloco sta arrivanno 'o temporale,
mentre penzo doppo nu poco chiove ggià.
'O cielo 'e nuvole nere e ggrigie se tegne,
'int'a nniente nu lampo 'o cielo straccia.

Mentre nu tuono me ntrona 'int'ê rrecchie,
nu sbuffo 'e viento mme schiaffea 'a faccia.
A ppasso svelto verso casa me ncammino,
rattristata 'a nu malinconico autunno.

Astrignenneme 'int'ê vvraccia cunserte,
veco chiagnere 'stu cielo grigio fummo.
Nanto ca 'o tiempo 'e pressa scorre
e 'a natura se cagna e scagna 'e vveste,

i' nun riesco a mantennere cchiù 'o tiempo:
va veloce e io so ssempe meno lesta.
Penzo a ogn'ora ca 'e pressa va e ppassa
e qquaccheduno sempe 'o lassa p' 'a via!

Mentre n'alba nasce e nu tramonto more,
mme sento ncuorpo nu mare 'e pucundria.
Penzanno a cchello ca vulesso fa' dimane,
se fa verde 'e vulio ogni speranza mia.

Guardo nterra 'stu tappeto 'e foglie stanche,
comm'a na foglia ngialluta me sento pur'io!