Club Poetico

So' 'o primmo mese 'e ll'anno, so' Ggennaio,
songo 'o capomasto 'e tutto 'o calennario.
Certo, tenco na granna responsabbilità,
ogn'anno attocca a mme âccummincià.

Appriesso a mme vene 'o mese bbruttulillo
è ffratemo Febbraio...detto 'o nfamone.
Porta friddo, pioggia, neve e vviento.
È ccurto, male ncavato: è nu carugnone.

Po' nce sta Marzo, 'o mese pazzariello:
vene a cchiovere ncopp'ô cchiù bbello.
Apprimma ride...po' bbello e bbuono,
'Int'a niente scenne abbascio n'acquazzone.

Quanno trase 'o mese Aprile è na bbellezza
ll'aria addora 'e gardenia...che freschezza!
'A ggente addeventa cchiù allera, rilassata:
se scrolla d' 'e spalle 'o friddo d' 'a vernata.

Comm'è bbello Maggio, 'o mese d' 'e rose
'o mese 'e ll'ammore, 'o mese d' 'e spose.
'A natura se mbelletta, se regne 'e sciure
e ll'aria mprufummata se tegne 'e culure.

Cu 'o mese 'e Ggiugno 'o calore se fa sentì
e allora nun tiene ggenio 'e t'ammalincunì.
'O cielo celeste chiaro 'a tristezza fa passà:
te spuoglie, tiene voglia 'e ridere e ppazzià.

A Lluglio fa cauro, assaje, ma overo assaje:
è nu mese afuso, se dorme poco o maje.
Staje bbuono sul'ô ffrisco sott'â luggetella.
cu na bevanna fresca e na pagliarella.

'O mese Austo nce sta nu granne solleone,
vaje cercanno arrifrisco sott'ô mbrellone.
Te tuffe 'int'a ll'acqua, t'abbracce 'o mare...
e ogni ccore se sente nu poco marenaro.

Settembre accummencia a rrinfrescà,
'a bbella staggione poco a ppoco se nne va.
Ll'aria se fa frisculella, doce e frizzante:
te fa sentere gruosso comm'a nu ggigante.

Uttombre lassa nterra foglie ggialle, rosse,
'e rame spoglie chiagneno commosse.
Stuorme d'aucielle s'aizano nvolo,
cu 'e cumpagne vanno addó coce 'o sole.

Po' vene Nuvembre 'o mese d''e muorte:
'o cielo se fa grigio, lacremmea e cchiagne.
Cipresse, crisanteme a lluongo a lluongo,
sfilan'ê bborde d''e viale, p' 'e strate sulagne.

Dicembre è ll'urdemo mese d' 'a figliata:
ogni ccasa 'e tinte rosse sta addubbata.
Vene Natale, nasce 'o bbammeniello:
'int'ê ccase se fanno 'o presepe, ll'alberello.

E cchesta è 'a vita, n'avutata 'e calennario:
tanta nummarielle attaccate ncopp'ô foglio.
Ntanto ca 'o tiempo segna 'a data e ll'orario,
nu sciore nasce e nterra cadeno 'e ffoglie.

Comm'a nu treno ca corre ncopp'ê bbinarie,
passano ll'anne, veloce se sperdeno p''a via.
'O tiempo s'arrobba tutto 'o presente tujo...
pe rricordo te lassa nu mare 'e pucundria.