Club Poetico

'O pparlà avvacante è 'na zezzenella senza latte.
È 'na fenesta aperta ca tuculiata d'ô viento sbatte. 
È 'na connola senza criaturo, 'nu prato senza ciore,
'nu cuollo senza 'a capa, 'nu pietto senza 'o core.

Quanta gente parla parla e tu te staje zitto 'e siente,
appizze 'e rrecchie speranno 'e avè n'insegnamento.
Pienze ca è 'a vota bona pe te 'mparà 'na leziona.
Accuorto staje a ssentere mettennece attenzione.

Aspiette ca ll'aggraziato suono 'e 'nu mandulino,
te 'ntona 'na strofa p'organizzà 'nu concertino.
Spiere ca 'na luce scintillanno te da n'illuminazione.
Guarde 'e n'aria cercanno 'e acchiappà ll'ispirazione.

Staje attiento a 'nun te perdere manco 'na parola,
te lusinghe ca staje avenno 'na granda e bona scola.
Ma quanno po' t'accuorge ca è 'nu parlà avvacante,
ca so' sulo chiacchiere e 'nun è niente 'e 'mpurtante,

dint'ê rrecchie te siente 'e sbuffà e suspirà 'o viento
e ce rimane male pecchè 'nun t'he 'mparato niente.
'O pparlà avvacante è comme a 'nu sciuscio 'e viento:
è acqua ca 'nun 'nfonne, 'nun leva sete: 'nun è niente...