Club Poetico

Lassateme sta', faciteme chiagnere:
nun me pozzo agnottere 'o dulore.
Ll'uocchie teneno ggià 'e llacreme pronte:
senza ca mme n'addono jesceno fore.

Comm'a goccia ca quanno chiove,
scorre luongo 'e vvenature 'e na foglia;
accussì 'e llacreme scenneno p' 'e vise;
quanno 'e chiagnere te vene 'a voglia.

Nce sta chi si 'o mmale fa troppo dulore,
s'annasconne 'o chianto pe ddecoro.
I' mmece chiagno, m'aggi' 'a sfucà:
si chiagno, nu poco 'e tristezza se nne va.

E si nun ve va e mme vedé triste,
nun v'angustiate, facite ll'indifferente.
Aspettate ca mm'accuieto e mme passa:
facite finta ca nun é succiesso niente.

Voglio chiagnere, n'atu ppoco ancora:
nun saccio si pe nu minuto o pe n'at'ora.
E si mme rummane n'atu ppoco 'e dulore,
chiagno quanno ncielo 'o sole more.

Quanno ll'ombre cummogliano 'o chiarore
e so' ssicura ca nisciuno mme guarda.
Quanno 'a notte pitta 'o munno 'e niro,
'int'ô scuro nun se po' ncrucià nu sguardo.

Si quanno tutto 'o munno s'arreposa,
'int'ô scuro sentite nu chianto, nu lamiento;
nun ce facite caso, nun v'angustiate:
songh'io ca allucco nzieme ô viento.