Club Poetico

'A vita, spisso è ddoce, ê vvote è amara:
cierti vvote è ggenerosa, ciert'ate è avara.
Nce sta chi a mmalapena ll'assapora,
e cchi nne sente sulamente ll'addore.
Nce sta chi campa nuvanta, cient'anne,

e ttira annante fra acciacche e malanne
e cchi mmece se fa sulo n'affacciata:
se bbeve 'a vita 'int'a na sola surziata.
Nce sta chi cuntanno fatte 'e ggiuventù,
penza ô tiempo ca nun turnarrà cchiù:

tene appicciata 'int'a ll'uocchie na lucella,
ca se fa sempe cchiù ppeccerenella.
Nfin'a ll'urdemo se va truvanno 'o spasso:
nfino a qquanno 'a vita nun ce lassa.
Si campassemo e tturnassemo a nnascere,

fosse bbello, putessemo assaje pascere.
Nce purtassemo 'a champagna 'int'ô tauto
e bbrindassemo â vita ch'è appena ffernuta.
Po' tutte mbriache turnassemo a ccampà:
facessemo quacche ggruosso vagito

e ccomme si niente fosse succiesso...
nce tuffassemo a ppesce 'int'a n'ata vita.
Mmece 'sta vita ca tenimmo ll'afferammo,
cu ttutta 'a forza ca tenimmo 'int'ê vvracce.
Comm'a ll'evera ô muro nce attaccammo,

nfin'a qquanno na falce nunn 'a straccia.
Tremmammo si 'o viento nce tuculea,
chiagnimmo si 'a pioggia sbatte forte.
Ogni gghiuorno 'e vita ca campammo,
nce sta "essa" ca nce aspetta for'â porta.

Tutte vanno truvanno medaglie e ccoppe:
nce sta sempe chi se vo' mettere 'a coppa.
Nun se capisce ca te può ppure affannà,
ma nun 'o vince 'o premio 'e ll'immortalità.