Club Poetico

Ninna nanna nenna mia,
libbera nsuonno 'a ffantasia
Duorme duorme peccerella,
'int'ê vvracce 'e mammarella.
'St'uocchie ca tiene nzerrate,

int'ô scuro de 'a nuttata,
quanno ll'arrape â mmatina,
so ppiezze 'e cielo celestine.
Ninna nanna, ninna nonna,
sonna tanta bbelli suonne.

A 'e lupe statte accorta,
tiene bbona nzerrata 'a porta.
Si te vieste 'a pecurella,
te vene stracciata 'a pelle.
Ninna nanna ninnarella,

duorme 'into â cunnulella.
Cu 'sti mmane pezzerelle,
chello ca vide vuò afferrà.
Nun desiderà ogni ccosa,
tutto nun se po' ppiglià.

Vide addó miette 'e mmane,
te può ppognere 'e ddetelle.
Mmiez'ê mmore truove 'e spine,
nenna mia...ricuordatello.
Nun te mettere sott'ê luce,

statt'accorta ca t'abbruce.
Nun t'accustà troppo 'a miccia,
ca cu 'o ffuoco po' t'appicce.
Ninna nanna rusellina,
nenna bbella e ffarfallina.

Arrepuose vocca 'e rosa,
mpaurita sì, ma curaggiosa.
Nun dà sempe e ssulo vasille,
mparate a ddà pure 'e murzille.
'A vita nun sempe è llieta...

vide addó miette 'e piede.
Quanno grossa tu sarraje,
e na nennella astrignarraje...
appen'a notte 'o scuro spanne
...tu cantale 'sta ninna nanna.