Club Poetico

'E panne spas'e Napule so' na bbella verità:
stanno llà appise e sse vonno fa' guardà.
Panne stise ô sole, tutte nfila e aunite,
ca spannono 'int'a ll'aria n'addore 'e pulito.

Panne pettegole ca se metteno a nciucià:
nzurfat'a ll'aria 'e mare se vonno appiccicà.
Panne arraggiuse, curiuse e ncazzuse,
ca sciosciano forte si 'o mare è nnervuso.

Panne stise a ll'aria, asciuttate d' 'o viento,
se contano parlanno...ggioie e tturmiente.
So' storie spase, chiacchiere 'e pariente,
voc'e popolo: si appizz'a recchia 'e ssiente.

So' llenzole ca parlano 'e na nott'e passione,
panne piccerille ca te danno n'emozione.
Sarranno sulo panne, però sanno parlà:
tutt'e juorne se stenne 'o ppoco 'e ntimità.

Cuperte cunzummate, currede arricamate.
Merlette, nastre, vrenzole arrepezzate.
Nun so' panne stise, ma fogli'e cart'appise,
addó senza sapé...ogneduno parla 'e sé.

So' ttanta menestrelle, giullare, cantastorie:
contano asciuttannese, miserie e gglorie.
Chiste so' 'e pann'e Napule: pure senza di',
sciuscianno te parlano; se sanno fa accapì.